Header Image Promo

2017 წლის I კვარტალი

 საერთაშორისო და ადგილობრივ ბაზარზე ქართული ღვინის პოპულარიზაციისა და ექსპორტის ზრდის ხელშეწყობის მიზნით, ღვინის ეროვნული სააგენტო ორგანიზებას უკეთებს დეგუსტაციებს,  კონკურსებს, საერთაშორისო ღვინის კონფერენციებს, გამოფენების და მედია-ტურების ჩატარებას.

მარკეტინგული აქტივობა ორ ძირითად მიმართულებას მოიცავს:

რეგიონები, სადაც საქართველოს, როგორც ქვეყნის და შესაბამისად ქართული ღვინის ცნობადობა არის დაბალი;

რეგიონები, სადაც ცნობადობა არის მაღალი, მაგრამ საჭიროა ლოიალური სეგმენტის ზრდა.

ქართული ღვინო პროფესიონალებისა და მოყვარულების წინაშე 3 ძირითადი გზავნილით წარსდგება: „საქართველო ღვინის აკვანი“, რაც დაფუძნებულია მრავალ ისტორიულ და არქეოლოგიურ ფაქტებსა და წყაროებზე, რომ საქართველო მეღვინეობის ერთ-ერთ უძველეს კერას წარმოადგენს.

მნიშვნელოვანი გზავნილია  „8 ათასი უწყვეტი რთველი“ - საქართველო ერთადერთი ქვეყანაა, სადაც 8 ათასი წლის დაიწყეს ღვინის წარმოება და ამ კულტურას წყვეტა არ ჰქონია.

მესამე ძირითადი გზავნილია - 525 უნიკალური ადგილობრივი ჯიში. ვაზის ჯიშების მრავალფეროვნებით საქართველო მართლაც გამორჩეული და უნიკალურია მსოფლიოს მეღვინეობით განთქმულ ქვეყნებს შორის. საქართველოში აღწერილია კულტურული ვაზის 500 ზე მეტი ქართული ჯიში. ასეთი მრავალფეროვნება ადასტურებს, რომ საქართველოში კულტურული მევენახეობა ათასწლეულებს ითვლის.

ცალკე სეგმენტად გამოიყოფა ქართული ქვევრის ღვინო. ქვევრის ღვინის დამზადების უნიკალური წესისა და ტრადიციების პრომოცია ხდება, როგორც გამოფენა-ღონისძიებების, ასევე სხვა საკომუნიკაციო არხების მეშვეობით.  ქვევრის ღვინის დაყენების ქართულ ტრადიციულ მეთოდს 2013 წელს იუნესკოს (UNESCO) არამატერიალური კულტურული მემკვიდრეობის ძეგლის სტატუსი მიენიჭა, რაც ამ მეთოდის უნიკალურობაზე მიუთითებს და გზავნილია მთელი მსოფლიოსთვის, რომ ღვინო უძველესი ქართული კულტურის შემადგენელი ნაწილია.

2017 წლის პირველ კვარტალში ქართული ღვინის პოპულარიზაციისა და ცნობადობის გაზრდის მიზნით, ღვინის ეროვნული სააგენტოს ხელშეწყობით ღონისძიებები გაიმართა საქართველოში და მსოფლიოს 7 ქვეყანაში: ჩინეთი, საფრანგეთი, ჰოლანდია, დიდი ბრიტანეთი, გერმანია, იაპონია და აშშ.

ქვევრის ღვინის  წარდგენა საფრანგეთში

30 იანვარიდან 4 თებერვლამდე ქვევრის ღვინის პრეზენტაცია-დეგუსტაცია საფრანგეთის ქალაქებში  გაიმართა. ღვინის ეროვნული სააგენტოს მხარდაჭერით, ფრანგ ღვინის პროფესიონალებს  შესაძლებლობა მიეცათ გაცნობოდნენ და დაეგემოვნებინათ ექვსი ქართული ბუნებრივი ღვინოების მწარმოებელი კომპანიის ღვინოები: „ნიკოლაძეების მარანი“, „ანთაძის მარანი“, „ხოხბის ცრემლები“, „ოქრო ღვინო“, „იაგოს ღვინო“ და „კორტავების მარანი“.

ქვევრის ღვინო წარდგენილი იყო ტულუზაში და ლიონში გამართულ სპეციალიზირებულ დეგუსტაციებზე, ხოლო  ანჟესა (Les Penitentes) და სომურში (La Dive Bouteille) - ტრადიციულ გამოფენებზე, სადაც ქართული ღვინის კომპანიები უკვე მეექვსედ მონაწილეობდნენ.

ქართული ღვინის წარდგენა ბოსტონსა და ნიუ-იორკში

18-19 თებერვალს, აშშ-ს ქალაქ ბოსტონში  ღვინისა და სპირტიანი სასმელების მასშტაბურ საერთაშორისო გამოფენაში „Boston Wine Expo”, ქართული ღვინის მწარმოებელი 18 კომპანია მონაწილეობდა. „Boston Wine Expo”   წელს 26-ედ ჩატარდა და მას ტრადიციულად ათასობით სტუმარი - ღვინის იმპორტიორი, დისტრიბუტორი, სომელიე და მედიის წარმომადგენელი დაესწრო. გამოფენაზე მსოფლიოს სხვადასხვა ქვეყნიდან ათასობით დასახელების ღვინო იყო წარმოდგენილი.

21 თებერვალს ღვინის ეროვნული სააგენტოსა და მარკეტინგული კომპანია „Marqenergie”-ს ერთობლივი ორგანიზებით, ნიუ-იორკში „ქართული ღვინის დღე“ მოეწყო, სადაც წარმოდგენილი იყო 20-მდე ქართული ღვინის მწარმოებელი კომპანიის 40 დასახელების როგორც ქვევრის, ისე კლასიკური მეთოდით დაყენებული ღვინოები. ღონისძიების ფარგლებში გაიმართა ორი დეგუსტაცია-სემინარი: ღვინის იმპორტიორებისა და ღვინის დამფასებლებისათვის.

 ბრიტანელი პროფესიონალების სემინარი თბილისში

20-21 თებერვალს ინგლისელმა ღვინის მაგისტრმა სარა ებოტმა (Sarah Abbott) და ღვინის მწერალმა რობერტ ჯოზეფმა (Robert Jozeph) ქართულ ღვინის კომპანიებთან ერთად, ქართული ღვინის დიდი ბრიტანეთის ბაზარზე დამკვიდრების სტრატეგიული გეგმა განიხილეს.

ღვინის ეროვნული სააგენტოს ორგანიზებით ჩატარებულ ორდღიან სემინარში, სადაც 35 ქართული ღვინის კომპანიის წარმომადგენელი მონაწილეობდა, მონაწილეებმა ის ძირითადი ღონისძიებები და მიმართულებები განიხილეს, რომლებიც ქართულ ღვინოს დაეხმარება დიდი ბრიტანეთის ბაზარზე დამკვიდრებაში.

 ქართული ღვინის პრეზენტაცია სტოკჰოლმში

15 თებერვალს ღვინის ეროვნული სააგენტოს, შვედეთი-საქართველოს სავაჭრო პალატის, შვედეთის სამეფოში საქართველოს საელჩოსა და ქართული ღვინის კომპანიების მხარდაჭერით სტოკჰოლმში, ქართული ღვინის პრეზენტაცია-დეგუსტაცია გაიმართა. ღონისძიება ემსახურებოდა ქართული ღვინის საექსპორტო ბაზრების დივერსიფიკაციას, შვედეთის ღვინის ბაზარზე ქართული ღვინის პოპულარიზაციას,  ადგილობრივ მომხმარებელში და პროფესიონალებში ქართული ღვინის ცნობადობის გაზრდას.

ღონისძიებას შვედეთის სასტუმროებისა და რესტორნების მფლობელები, ღვინის იმპორტორები და მედიის წარმომადგენლები დაესწრნენ. ქართულმა ღვინომ სტუმრებზე განსაკუთრებული შთაბეჭდილება მოახდინა, რის გამოც, მათმა ნაწილმა გადაწყვიტა გაზაფხულზე პირადად ეწვიოს საქართველოს და ადგილზე გაეცნოს ქართული ღვინის კულტურას და ღვინის კომპანიების საქმიანობას. სტოკჰოლმში, საქართველოს საელჩოში გამართულ დეგუსტაციაზე წარმოდგენილი იყო ათი ქართული ღვინის კომპანიის პრემიუმ ღვინოები.

ქართული ღვინის წარმატება იაპონიაში

1 მარტს, 12 დასახელების ქართულმა ღვინომ იაპონიის დედაქალაქ ტოკიოში, საერთაშორისო კონკურსში „საკურა“ (The 4rd “Sakura” Japan Women’s Wine Awards 2017) უმაღლესი ჯილდოები -  ერთი „ორმაგი ოქრო“, ექვსი - ოქროს და ხუთი ვერცხლის მედალი დაიმსახურა. „საკურას“ საერთაშორისო კონკურსი მასშტაბური ღონისძიებაა, რომელიც წელს მეოთხედ ჩატარდა. კონკურსის ჟიური დაკომპლექტებულია იაპონიაში ღვინის სფეროში მოღვაწე ქალბატონებით - სომელიეებით, ღვინის მწერლებითა და ჟურნალისტებით.

სულ კონკურსში 37 ქვეყნის 4212 ღვინო იყო წარდგენილი.  

 გამარჯვებული ღვინოებია: ორმაგი ოქრო -  ვაზიანი კომპანი - საფერავი 2015;

ოქრო:  ბინეხი - საფერავი 2015; თელავის ღვინის მარანი - კონდოლი საფერავი 2014;   თელავის ღვინის მარანი - სატრაპეზო საფერავი 2013; მილდიანი - ქინძმარაული 2014;   ვაზიანი კომპანი - ქისი 2015; მეღვინეობა ხარება - საფერავი 2013

ვერცხლი: თელავის ღვინის მარანი - მუკუზანი 2014; მილდიანი - საფერავი რეზერვი 2011;   შუმი - საფერავი BIO 2014;  მეღვინეობა  ხარება - ქინძმარაული 2014; ბესინი - ბესინი პრემიუმი (წითელი) 2013

,,FOODEX JAPAN 2017

7-10 მარტს ქართული ღვინის სემინარი-პრეზენტაცია იაპონიის დედაქალაქ ტოკიოში მიმდინარე კვების პროდუქტებისა და სასმელების 42-ე საერთაშორისო გამოფენის ,,FOODEX JAPAN 2017”-ის ფარგლებში გაიმართა. გამოფენის ოფიციალურ გახსნასა და ქართული ღვინის პრეზენტაციას საქართველოს სრულუფლებიანი და საგანგებო ელჩი იაპონიაში ლევან ცინცაძე დაესწრო.

ქართული ღვინის სემინარს ღვინის ეროვნული სააგენტოს მარკეტინგისა და საზოგადოებასთან ურთიერთობის დეპარტამენტის უფროსი ირაკლი ჩოლობარგია უძღვებოდა და მას ღვინის თემაზე მომუშავე ჟურნალისტები, ღვინის იმპორტიორები, ექსპერტები, რესტორნებისა და სავაჭრო ქსელების წარმომადგენლები დაესწრნენ.    პრეზენტაცია მოიცავდა ქართული ღვინის ისტორიისა და კულტურის 8-ათასწლიანი განვითარების მოკლე მიმოხილვას. დეგუსტაციაზე წარმოდგენილი იყო 6 დასახელების ქართული ღვინო.

 RAW London 2017

12-13 მარტს, დიდ ბრიტანეთში დედაქალაქ ლონდონში ტარდება ბუნებრივი ღვინოების  საერთაშორისო გამოფენა ,,RAW London” (The Artisan Wine Fair London), სადაც ღვინის ეროვნული სააგენტოს მხარდაჭერით, ქვევრის ღვინის მწარმოებელი 6 კომპანია მონაწილეობს: “გოცას მარანი”, “ნათენაძის ღვინის მარანი“, „ფაფრის ველი“, „ნაოტარი“, „ტიბაანი“ და „გაიოზ სოფრომაძის მარანი“.  

გამოფენის ორგანიზატორია მსოფლიოში ცნობილი ღვინის ექსპერტი, საერთაშორისო ღვინის მაგისტრი იზაბელ ლეჟერონი (საფრანგეთი).

ქართველი მეღვინეები აცხადებენ, რომ გასულ წლებში აღნიშნულმა გამოფენამ მათ მნიშვნელოვანი იმპორტიორები შესძინა.

დეგუსტაცია მონაკოში

20 მარტს, მონაკოს სომელიეთა ასოციაციის ვიცე პრეზიდენტის, დომინიკ მილარდის ინიციატივითა და ღვინის ეროვნული სააგენტოს მხარდაჭერით, ქართული ღვინის დეგუსტაცია მონაკოში გაიმართა. ღონისძიებას ღვინის ეროვნული სააგენტოს თავმჯდომარე გიორგი სამანიშვილი და სააგენტოს სადეგუსტაციო კომისიის თავმჯდომარე ანა გოდაბრელიძე დაესწრნენ.

 დეგუსტაციას 85 სომელიე, მეღვინე, ჟურნალისტი და მეწარმე დაესწრო როგორც იტალიიდან, ასევე საფრანგეთიდან. სულ წარმოდგენილი იყო 7 ქართული კომპანიის ღვინოები: „შუხმან ვაინს ჯორჯია“, „შალაურის ღვინის მარანი“, „კახური“, „ვიტა ვინეა“, „თელედა“, „ფერაძის მარანი“ და „ვინივერია“.

ქართული ღვინის წარდგენა მიზნად ისახავდა, რომ დამსწრე საზოგადოებას გაეცნო როგორც ევროპული, ასევე ტრადიციული წესით დაყენებული ქართული ღვინო, მიეღო ინფორმაცია ქართული ყურძნის ჯიშების, ვაზის და ღვინის კულტურისა და ისტორიის შესახებ.

 ქართული ღვინის დეგუსტაცია ასევე კლერმონ-ფერანში  გაიმართა.

ProWein-2017

გერმანიის ქალაქ დიუსელდორფში ღვინისა და ალკოჰოლიანი სასმელების ყოველწლიური საერთაშორისო გამოფენა ProWein-2017 ჩატარდა, სადაც ღვინის ეროვნული სააგენტოსა და ასოციაცია „ქართული ღვინო“-ს მხარდაჭერით, ქართული ღვინის მწარმოებელი 23 კომპანია მონაწილეობდა.

გამოფენის ფარგლებში ქართული ღვინის 2 დეგუსტაცია გაიმართა ევროპის წამყვანი მეღვინეობის ჟურნალ „ვინუმის“ (Vinum) სტენდზე, რომელსაც გამოცემის მთავარი რედაქტორი რუდოლფ კნოლი (Rudolf Knoll) უძღვებოდა. დეგუსტაციაზე წარმოდგენილი იყო 14 დასახელების ქართული ღვინო.

The 96th China Food & Drinks Fair 

ჩინეთში, სიჩუანის პროვინციის ქალაქ ჩენგდუში ღვინისა და საკვების საერთაშორისო გამოფენა - The 96th China Food & Drinks Fair გაიმართა, რომელშიც ღვინის ეროვნული სააგენტოს ხელშეწყობით, ქართული ღვინის მწარმოებელი 27 კომპანია მონაწილეობდა.

ღონისძიებას ღვინის ეროვნული სააგენტოს მარკეტინგისა და საზოგადოებასთან ურთიერთობის დეპარტამენტის უფროსის მოადგილე თამთა ყველაიძე დაესწრო. მისი თქმით, გამოფენის პირველ დღეს დაფიქსირდა გამოფენის არსებობის მანძილზე ვიზიტორთა რეკორდული რაოდენობა - 250 ათასი ადამიანი.

დეგუსტაცია ჰოლანდია

22 მარტს,  ამსტერდამში  სააგენტოს კონტრაქტორი კომპანიის ,,საფერავი ვაინ ეიჯენსის“ (Saperavi Wine Agency) ორგანიზებით ქართული ღვინის დეგუსტაცია გაიმართა. აღნიშნული კომპანია აქტიურად ეწევა ქართული ღვინის იმპორტს ჰოლანდიაში და ხელს უწყობს  ქართული ღვინის ცნობადობის ამაღლებას ამ ქვეყანაში, ასევე ქვევრში ღვინის დამზადების უნიკალური წესის და უძველესი აბორიგენული ვაზის ჯიშების პოპულარიზაციას.