WinExpo Georgia 2016 
Header Image Promo

WinExpo Georgia 2016

თარიღი: 2016-06-03

3-5 ივნისს, საგამოფენო ცენტრ „ექსპო ჯორჯია“ ორგანიზებით და საქართველოს სოფლის მეურნეობის სამინისტროს ღვინის ეროვნული სააგენტოს ოფიციალური მხარდაჭერით, ,,ღვინისა და ალკოჰოლური სასმელების მე–9 საერთაშორისო გამოფენა – WinExpo Georgia 2016“ იმართება.

გამოფენა WinExpo Georgia 2016 სოფლის მეურნეობის მინისტრის პირველმა მოადგილემ, ნოდარ კერესელიძემ გახსნა. ღონისძიებას ესწრებოდნენ ღვინის ეროვნული სააგენტოს თავმჯდომარე გიორგი სამანიშვილი, ტურიზმის ეროვნული ადმინისტრაციის ხელმძღვანელი გიორგი ჩოგოვაძე, თბილისის ვიცე-მერი ირაკლი ლექვინაძე, ასოციაცია ,,ქართული ღვინის“ თავმჯდომარე თინა კეზელი, ღვინის მწარმოებელი კომპანიების წარმომადგენლები, ღვინის ექსპერტები და დარგის სპეციალისტები.

სოფლის მეურნეობის მინისტრის მოადგილემ, ნოდარ კერესელიძემ მადლობა გადაუხადა გამოფენის ორგანიზატორებს, ღვინის საერთაშორისო ექსპერტებს, მეწარმეებს და მცირე მარნების წარმომადგენლებს გამოფენაში მონაწილეობისთვის და აღნიშნა, რომ მათი აქტიური ჩართულობა აღნიშნულ გამოფენას მასშტაბურს და პრესტიჟულს ხდის.

,,სოფლის მეურნეობის სამინისტრო ჩართულია ყველა იმ აქტივობაში, რომელიც ორიენტირებულია საქართველოში მევენახეობა-მეღვინეობის დარგის განვითარებასა და პოპულარიზაციაზე. ეს გამოფენაც სწორედ ამ მიზანს ემსახურება. ეს გამოფენა მეღვინეობის დარგში ერთ-ერთი ყველაზე მასშტაბური ღონისძიებაა, სადაც ღვინის მწარმოებელ კომპანიებს საშუალება აქვთ საკუთარი პროდუქცია გააცნონ მომხმარებელს, ღვინის პროფესიონალებს, ღვინის ბიზნესისა და მედიის წარმომადგენლებს. მსგავსი ღონისძიებები გვაძლევს საშუალებას წარმოვაჩინოთ საქართველო, როგორც ღვინის სამშობლო და ვიამაყოთ ჩვენი ღვინის კულტურის რვაათასწლიანი, მრავალფეროვანი ისტორიით“, - აღნიშნა ნოდარ კერესელიძემ.

როგორც ღვინის ეროვნული სააგენტოს თავმჯდომარემ განაცხადა, გამოფენის მონაწილეთა რაოდენობა ყოველ წელს იზრდება

„ჩვენ მე-9 წელია ამ გამოფენის პარტნიორები ვართ. ქვეყანაში, სადაც არის უზარმაზარი ღვინის ისტორია და კულტურა, რამდენიმე გამოფენა უნდა იყოს, სადაც ღვინის მწარმოებლები შეძლებენ ერთად წარმოაჩინონ  საკუთარი პროდუქცია და გააცნონ ყველა დაინტერესებულ პოტენციურ მომხმარებელს, ეს იქნება უცხოეთიდან ჩამოსული, თუ ქართველი მომხმარებელი, რომელიც ასევე ძალიან მნიშვნელოვანია. მადლობა მინდა გადავუხადო გამოფენის ყველა ორგანიზატორს, მონაწილეს და სტუმარს მობრძანებისთვის და გითხრათ, რომ ღვინის ეროვნული სააგენტო ჩართული იქნება ყველა იმ აქტივობაში, რომელიც ორიენტირებული იქნება საქართველოში მევენახეობა-მეღვინეობის დარგის განვითარებასა და პოპულარიზაციაზე”,  - აღნიშნა გიორგი სამანიშვილმა.

გამოფენაში მონაწილეობას იღებს 95 კომპანია 5 ქვეყნიდან (საქართველო, უკრაინა, გერმანია, იტალია, საფრანგეთი). WinExpo Georgia 2016-ზე წარმოდგენილია როგორც ღვინო და ალკოჰოლური სასმელები, ასევე ღვინის საწარმო მანქანა–დანადგარები, აქსესუარები, გადამამუშავებელი ხაზები, შესაფუთი მასალა, მინის ტარისა და საცობის მწარმოებელი და დისტრიბუტორი კომპანიები.

გამოფენის ფარგლებში მოწყობილია მცირე და ოჯახური მარნებისა და ქვევრის ღვინის მწარმოებლების კუთხე. WinExpo Georgia 2016-ს სტუმრებს შესაძლებლობა მიეცემათ საუკეთესო ქართულ ღვინოსთან ერთად, ქართული ტრადიციებით დამზადებულ ყველის ნაირსახეობებს გაეცნონ.

ღვინისა და ალკოჰოლური სასმელების საერთაშორისო გამოფენის ფარგლებში, 3-4 ივნისს ჩატარდება ღვინის მე-8 საერთაშორისო კონკურსი - 8th International Wine Award. კონკურსზე წარდგენილ ღვინის ნიმუშებს ენოლოგების საერთაშორისო ექსპერტებით, ცნობილი ღვინის ჟურნალისტებით და სპეციალისტებით დაკომპლექტებული ჟიური შეაფასებს. ჟიურის შემადგენლობაში შედიან: ჟიურის თავმჯდომარე, ღვინის მაგისტრი - ტიმ ატკინი (Mr. Tim Atkin MW - ბრიტანეთი), ღვინის მაგისტრი- კენიჩი ოჰაში (Kenichi Ohashi MW - იაპონია), ღვინის მაგისტრი - რიჩარდ კერშაუ (Richard Kershaw MW – სამხრეთ აფრიკა), ისა ბალი (Isa Bal MS, ოსტატი სომელიე – თურქეთი), ენოლოგი და ღვინის ექსპერტი - მიხეილ  მესხი (საქართველო) და ღვინის ექსპერტი, საქართველოს სოფლის მეურნეობის მინისტრის მოადგილე ლევან დავითაშვილი (საქართველო). 4 ივნისს, კომპეტენტური ჟიური სხვადასხვა კატეგორიაში გამარჯვებულ ღვინოებს საზეიმო ღონისძიებაზე დააჯილდოვებს.

 ღვინისა და ალკოჰოლური სასმელების მე–9 საერთაშორისო გამოფენის ფარგლებში, საგამოფენო ცენტრის ,,ექსპო ჯორჯიას“ XI პავილიონში გამოფენის ვიზიტორებსა და მონაწილეებს შესაძლებლობა ექნებათ დაესწრონ ლევან მოსიაშვილის გამოფენას - „ღვინის ხელოვნება“.